माझा ( नसलेला ) हॅपी बर्थडे

काल डोळे चोळत उठलो ते एका फोननी
एका अगदी जुन्या मित्रांनी आवर्जून फोन केला होता. मला कळेनाच की नेमकी काय गोष्ट घडली आहे. आणि दोन मिनिटानंतर तो मला वाढदिवसाच्या शुभेच्छा देत होता.
मी पुन्हा पुन्हा विचार करत होतो माझा वाढदिवस आज नाही तरी देखील हा मला वाढदिवसाच्या शुभेच्छा का देतो, थोडा वेळ माझी ट्यूब काही पेटली नाही. इकडच्या तिकडच्या गप्पा झाल्या मी फोन ठेवला.

व्हाट्सअप उघडून बघितला तर मला ओळखणाऱ्या आणि न ओळखणाऱ्या अशा अनेक मित्रांकडून वाढदिवसाच्या शुभेच्छांचा पूर आलेला होता.

मी एकदा पॅन कार्ड बघितले, माझी टीसी चेक केली, आई-वडिलांना फोन करून नक्की माझा वाढदिवस आज आहे का नाही असे विचारून घ्यावे असे देखील वाटले.

माझा वाढदिवस म्हणजे काही गांधी जयंती नाही, सगळ्या दुनियेला माहिती असण्याची शक्यताच नाही.

माझ्यासाठी माझा वाढदिवस हा स्वतःसोबत घालवायचा दिवस असतो. माझ्या आई वडील बायको मुलं यांच्यापलीकडे तो कोणालाही ठाऊक नाही.

ज्यांच्याकडे मी पैसे गुंतवले अशा सगळ्या म्युच्युअल फंड बँक यांना मात्र तो नक्की ठाऊक असतो व त्या दिवशी सकाळी सकाळी हॅपी बर्थडे च्या मेल्सचा मारा झालेला असतो.

आणि मग मला लक्षात आलं ओहो हे तर मी नवीन सुरू केलेलं फेसबुक प्रकरण आहे. फेसबुक वर कशाला आपली खरी वाढदिवसाची तारीख टाकायची म्हणून मी एक फेब्रुवारी टाकून दिली.

1 फेब्रुवारी म्हणजे बजेटचा दिवस निर्मला सीतारामन मॅडमने मध्यमवर्गीयांचा विकास म्हणून खूप सवलतींची खैरात केली, खास करून इन्कम टॅक्स.

मध्यमवर्गीयांचा विकास व  सावरकरांचा विकास असं यमक मस्त जुळून आलं व काही मित्रांनी त्याचा उपयोग करत छान शुभेच्छा दिल्या.

मित्रांनो ज्या सगळ्यांनी शुभेच्छा दिल्या व ज्यांनी मनापासून आठवण काढली त्या सगळ्यांना खूप खूप धन्यवाद. काहींनी गिफ्ट देखील पाठवले त्यांना देखील खूप खूप धन्यवाद.

हा माझा नसलेला पण साजरा झालेला पहिलाच बर्थडे. तो आयुष्यभर लक्षात राहील हे नक्की.

विकास सावरकर
एक फेब्रुवारी 2025